بريدك بريدك بريدك

ياحليل الزمن الكان فيه الاباء والامهات والابناء والعشاق ينتظروا فيه الجوابات على احر من الجمر,وتلتقى الناس فى الحلة يسالوا اه فلان ما رسله جواب, وعند وصول الجواب تلقى الناس متلمى فطن البيت و كل واحد منتظر الزول البقرى لما ينتهى من السلام و الدخول فى التفاصيل لانه اى واحد عنده غرض داير يشوفوا قضوهو ليه والا لا, طبعا هنالك عبارات معروفة فى استهلال و متن الجواب زى نحن بخير ولا نفقد سوى رؤياكم الغالية,والجواب عنده طقوس معينة فى الكتابة والتسلسل يبدا بالسلام على ناس البيت ثم الدخول فى الموضوع ثم تبليغ السلام لكل الاهل واهم شى الملحوظة و ده لو الواحد نسلالو شى مفروض يكتبوا فى الجواب و ما كتبوا يكون ملحوظة زى ادوا خالتى فلانة او عمى مبلغ من ضمن المصاريف او مرسل لكم بعض الاغراض مع شخص ,وكان جماعة زمان الواحد يقوم يجرح اصبعو و يبصم فى اخر الجواب ديل على الحب ,ديل جماعة الغرام,اسع الواحد ماعارف الشغلة تكون كيف مع زمن messengerوchat . فى حلتنا كان فى عمنا ودابراهيم ( علي ماظن اسمو كدا ) الله يرحمه شغال فى البوسته أخر الشهر تلقى الجماعة الاهلهم بيفوق مرنقين جنب بيته منتظرين الجوابات وخبر المصاريف وفى بعض التجار عندهم صناديق بوسته و ياحليل زمن البوسته برضو كانوا الناس يرسلوا الجوابات بواسطتهم, وهناك الكتير من الاغانى تغنت للجواب وحلات الجواب و منها رمية ود اليمنى الشهيرة والاغنية الخالدة لسيف الدين الدسوقى و غناء المرحوم الجابرى من طرف الحبيب جات اغرب رسايل و تانى يا حليل زمن الجواب.