صوت البندق

**الأستاذ عبدالرازق** السبت مايو 19, 2012 8:07 am

أجمل مستصحبات الإنسان هي تلك التي خلطته و خالطها وجدانيا مذ كان شافعا.. تكون دافئة صادقة و مليانة محنة .. شفت حلاة العصيدة و القراصة و الكسرة .. اتمدد على العنقريب .. و شفط شايا سوهو بالجمر .. اتوضا بالابريق و صلي على الفروة ... آكل من القدح ... خلي رجيلاتك تغطس في الطين .. أحلب غنيماتك و انفخ رغوة الحليب الدااااااافي و اقطع بيهو الريق .. لا بسكر لا بشاي لا بقهوة .. و وقت الدرت .. مع الفجر أمشي الزرع .. اتبلل بندى الصباح المتعلق بقش الأرض .. شيل قندول و امضغ على راحتك و كان دايرو مليل أو فريك .. اسمع للقمرية البتقوقي فوق شجرة التبلدية و ناس زينب و عاشة و فطومة الضحيكاتن بتسافر .. و ديل عيال الحلة بمسكو في الجراد .. لا شايلين هم و لا خايفين ... صورة جميلة و حتدوم و تدوم لو ما صوت البندقية النشاز خلت الناس تكب الرملة في الملاح و الغنماية المفزوعة تدفق الحليب بسكة رجل .. و القمرية الجاهلة بمكان الطلقة تطير بودار و ضحكة الشفع تبقى صراخ .. الله لا جاب البندق عشان الصورة الجميلة ما تتبدل.

احمد بشير ابراهيم السبت مايو 19, 2012 8:37 am

يا عبدالرازق ياخوي صوت البندقة مافي مفر منو طالما نحن ماقادرين نقبل غيرنا وافكاروا, طالما نحن بنفرض في سيطرتنا على الناس وكانما استعبدناهم, طالما غيرنا بسرق في خيراتنا ولمن ننضم بقولوا علينا مارقيين, طالما ان هناك تُجار دين وطالما بحكمونا الناس القُصر.
بس قول ربك يستر

صوت البندق

صوت البندق

رد: صوت البندق